लागूऔषधसहित मकवानपुरका दुई जना पक्राउ

मकवानपुर । मकवानपुरबाट प्रहरीले अवैध लागूऔषधसहित आइतबार बिहान दुई जनालाई पक्राउ गरेको छ ।

जिल्लाको मनहरी गाउँपालिका–९ ज्यामिरेबाट अवैध लागूऔषध गाँजा करिब ५६ किलोग्रामसहित दुई जनालाई पक्राउ गरेको प्रहरीले जनाएको छ ।

पक्राउ पर्नेहरुमा मनहरी गाउँपालिका–८ सिमपानी बस्ने २७ वर्षीय अनिल कुमार थिङ र सोही गाउँपालिका–९ बस्ने ३२ वर्षीय राजेन्द्र मुक्तान रहेका छन् । उनीहरुलाई इलाका प्रहरी कार्यालय मनहरीबाट खटिएको प्रहरीले पक्राउ गरेको हो ।

सिमपानीबाट वीरगंजतर्फ जाँदै गरेको ना.६ ख २३४४ नम्बरको ट्रकलाई जाँच गर्ने क्रममा चालक सिट भन्दा माथि क्यबिनमा प्लाष्टिकले बेरेर लुकाई छिपाई राखिएको उक्त गाँजा फेला पारी ट्रक चालक अनिल र ट्रकमा सवार राजेन्द्रलाई पक्राउ गरिएको हो ।

पक्राउ परेका उनीहरुमाथि प्रहरीले आवश्यक अनुसन्धानका साथै कानूनी प्रकृया अगाडि बढाएको छ ।