मोटरसाइकल दुर्घटना हुँदा दुई जनाको मृत्यु

बिर्तामोड । झापामा मोटरसाइकल दुर्घटना हुँदा दुई जनाको मृत्यु भएको छ । गएराति दमक नगरपालिका–१०, सेतुमारी चोकनजिक भित्री सडक खण्डमा सेतुमारी चोकबाट बालुबथानतर्फ जाँदै गरेको प्रदेश नं. १–०१–०१५ प १७९३ नम्बरको मोटरसाइकल आफै अनियन्त्रित भई दुर्घटना हुँदा दुई जनाको मृत्यु भएको प्रहरीले जनाएको छ ।

प्रहरीका अनुसार, दुर्घटनामा परेर मोटरसाइकल चालक मोरङ रतुवामाई नगरपालिका–८ बस्ने २७ वर्षीय बिराज थापा, सोही मोटरसाइकलमा सवार गौरादह नगरपालिका–५ बस्ने ३२ वर्षीया जमुना धिमाल र सोही ठाउँ बस्ने २५ वर्षीया मनचरी राई भनिने ओम कुमारी राई घाइते भएका थिए ।

घाइते तीनै जनलाई उद्दार गरी उपचारको लागि तीनै जनालाई दमक अस्पताल दमक पठाइएको थियो । तीमध्ये दुई महिलाको उपचारको क्रममा राति ११ः३५ बजे मृत्यु भएको थियो ।

यस्तै, मोटरसाइकल चालक थापालाई भने थप उपचारको लागि बीएण्डसी अस्पताल बिर्तामोड रेफर गरिएको छ । उक्त घटनाको बारेमा प्रहरीले आवश्यक अनुसन्धान गरिरहेको छ ।