हेटौंडामा ट्रकले किचेर एक जना घाइते

मकवानपुर । मकवानपुरको हेटौंडामा लोड ट्रकले किचेर एक जना गम्भीर घाइते भएका छन् । सोमबार अपराह्न हेटौंडा–४, रजजयन्ती चोक नजिक पूर्व–पश्चिम सडकखण्डमा ना ६ ख ३३७६ नम्बरको कनिका लोड ट्रकले साईकललाई ठक्कर लाग्नबाट बचाउँदा सडकको छेउमा बोरा ओडी सुतेको एक जनालाई किच्दा गम्भीर घाइते भएका हुन् ।

वीरगंजबाट हेटौंडातर्फ आइरहेको उक्त ट्रकले किच्दा ३५ वर्षीय कृष्ण न्यौपाने गम्भीर घाइते भएको मकवानपुरका प्रहरी नायव उपरीक्षक श्यामु अर्यालले जानकारी दिए ।

प्रहरी नायव उपरीक्षक अर्यालका अनुसार, न्यौपानेको बाँया खुट्टाको घुँडाभन्दा मुनीको भागमा चोटपटक लागेको छ । उनलाई उपचारको लागि तत्काल उद्दार गरि हेटौंडा अस्पताल ल्याइएको थियो । त्यहाँ उपचार सम्भव नभएपश्चात उनलाई थप उपचारको लागि चितवनको भरतपुर रिफर गरिएको छ ।

प्रहरीले ट्रक र ट्रक चालक पर्साको जिराभवानी-९, शंखरसरैयाका ट्रक चालक ४९ वर्षीय सुखाडी भैयालाई नियन्त्रणमा लिई घटनाको बारेमा आवश्यक अनुसन्धान गरिरहेको छ ।