हेटौंडाबाट गाँजासहित दुई जना पक्राउ

मकवानपुर । मकवानपुर प्रहरीले अवैध लागूऔषध गाँजासहित बिहीबार दुई जनालाई पक्राउ गरेको छ । प्रहरीले जिल्लाको हेटौंडा–१९, नेवारपानीस्थित पुर्व–पश्चिम सडकखण्डबाट लागूऔषध गाँजा १४ किलो ८३० ग्रामसहित दुई जनालाई पक्राउ गरेको हो ।

पक्राउ पर्नेहरुमा धादिङको रोराङ गाउँपालिका–२, ताल्ती बस्ने वर्ष ३५ को सोमिलाल चेपाङ र सोही ठाउँ बस्ने वर्ष २० को किशोर चेपाङ रहेको जिल्ला प्रहरी कार्यालय मकवानपुरले जनाएको छ ।

प्रहरीका अनुसार, उनीहरुलाई इलाका प्रहरी कार्यालय नेवारपानी मकवानपुरबाट खटिएको प्रहरी टोलीले पक्राउ गरेको हो । चितवनबाट हेटौंडातर्फ आउँदै गरेको लु ३ ख १७४१ नं. को यात्रुवाहक बसलाई रोकी चेकजाँच गरिएको थियो । सो क्रममा बसमा सवार भई आएका उनीहरु दुई जनाको साथबाट सो परिमाणका गाँजा बरामद भएपछि निजहरुलाई पक्राउ गरिएको हो ।

पक्राउ परेका सोमिलाल र किशोरलाई मकवानपुर जिल्ला अदालत हेटौंडाबाट ५ दिनको म्याद थप गरी अनुसन्धान कार्य अगाडि बढाइएको छ ।