मउवा संघलाई बलियो संस्थाको रूपमा स्थापित गर्न मेरो उम्मेदवारी

सवालः मकवानपुर उद्योग वाणिज्य (मउवा) संघको नेतृत्वको यो महत्त्वपूर्ण दौडमा तपाईंको उम्मेदवारी धेरैका लागि चासोको विषय भएको छ। तपाईंको उम्मेदवारीको प्रमुख उद्देश्य के हो ?

जवाफः धन्यवाद, मकवानपुर उद्योग वाणिज्य (मउवा) संघ केवल एउटा संस्था नभएर यस क्षेत्रका व्यवसायीहरूको आवाज हो । मेरो प्रमुख उद्देश्य भनेको यस संघलाई एकीकृत बनाउँदै व्यवसायीहरूको समस्याको समाधान गर्ने एउटा बलियो संस्थाको रूपमा स्थापित गर्नु हो । म संघलाई पारदर्शी, उत्तरदायी र व्यवसायीक सहजीकरणमा अगाडि ल्याउन चाहन्छु। यसलाई डिजिटलाइजेसन, समावेशी नीति र सहजीकरणमार्फत प्रभावकारी बनाउने मेरो योजना छ।

सवालः तपाईंको नेतृत्वमा संघलाई कसरी डिजिटल प्रणालीमा लैजाने योजना छ ?

जवाफः आजको युगमा डिजिटल प्रणाली अनिवार्य बनिसकेको छ । म संघका सबै सेवा प्रणालीलाई अनलाइन उपलब्ध गराउनेछु। सदस्यता नवीकरणदेखि समस्या दर्ता र समाधान प्रक्रियासम्म सबै कुरा डिजिटल हुनेछ। यसले व्यवसायीहरूले समय र स्रोत बचत गर्न सक्नेछन्। यस्तै, संघको आधिकारिक मोबाइल एप्लिकेशन पनि विकास गर्ने योजना छ, जसले सूचना, तालिमका अवसर र सरकारी नीति परिवर्तनसम्बन्धी खबर तुरुन्तै सदस्यहरूसम्म पुर्याउनेछ।

सवालः मोबाइल एप्लिकेशन र डिजिटल प्रणालीको योजना राम्रो छ । तर, ग्रामीण क्षेत्रमा पहुँच नभएका व्यवसायीहरूलाई यो प्रणालीले कसरी फाइदा पुर्याउछ ?

जवाफः यो विषय मैले पनि सोचेको विषय हो । हामी डिजिटल प्रणालीसँगै ग्रामीण पहुँचका लागि ‘मोबाइल सहजीकरण टोली’ खडा गर्नेछौं। यी टोलीले ग्रामीण व्यवसायीहरूको समस्या सुन्ने, उनीहरूको तर्फबाट दर्ता गर्ने र आवश्यक समाधान ल्याउने काम गर्नेछन्। यस्तो समन्वयले ग्रामीण व्यवसायीलाई थप सशक्त बनाउनेछ।

सवालः अब, मकवानपुरका व्यवसायीहरूले भोगिरहेका प्रमुख चुनौतीहरू के–के छन् र तपाईंको दृष्टिकोणमा तिनीहरूलाई कसरी सम्बोधन गर्न सकिन्छ ?
जवाफः व्यवसायीहरूले अहिले दुई ठूला समस्या सामना गरिरहेका छन्। पहिलो, कर प्रणालीको अनियमितता र दोहोरो करको समस्या। दोस्रो, बैंकिङ प्रणालीमा कडाइ र उच्च ब्याजदर। यी दुवै समस्या समाधानका लागि संघले सरकार र बैंकहरूसँग प्रत्यक्ष समन्वय गर्नेछ। करका सम्बन्धमा संघको एउटा ‘सल्लाहकार मञ्च’ बनाउनेछौं, जसले व्यवसायीहरूलाई कानुनी सहायता प्रदान गर्नेछ। बैंकिङ समस्याको समाधानका लागि सहुलियतपूर्ण कर्जा र ऋण पुनर्संरचनाको प्रस्ताव सरकार र बैंकहरूमा पेस गर्नेछौं ।

सवालः तपाईंले सरकारसँग समन्वयको कुरा गर्नुभयो । तर, के तपाईंको अनुभवले संघलाई यस्तो सरकारी समन्वयमा सक्षम बनाउनेछ ?
जवाफः म लामो समयदेखि संघ र विभिन्न वस्तुगत संघका सदस्यको रूपमा सक्रिय छु । सरकार र स्थानीय प्रशासनसँग मेरो अनुभव र समन्वय क्षमताले संघलाई प्रभावकारी रूपमा नेतृत्व गर्न सक्षम बनाउँछ। यसअघि, मैले करसम्बन्धी धेरै समस्या समाधान गर्न पहल गरेको छु। त्यही अनुभवलाई म अध्यक्षको भूमिकामा उपयोग गर्न चाहन्छु।

सवालः तपाईंको अनुभवबारे चर्चा गर्दा, तपाईंको योग्यता र पृष्ठभूमि व्यवसायीक नेतृत्वका लागि कस्तो रहेको छ ?
जवाफः मैले व्यवसायीक क्षेत्रमा १५ वर्षभन्दा बढी समय बिताएको छु। मेरो व्यवसायिक करियरमा मैले साना व्यवसायहरूबाट सुरु गर्दै औद्योगिक क्षेत्रमा पनि काम गरेको छु। यसबाहेक, म संघका विभिन्न समितिहरूको सदस्य भएर नीति निर्माण प्रक्रियामा सहभागी भएको छु। यी सबै अनुभवहरूले संघलाई अग्रगामी बनाउन मेरो नेतृत्वलाई मजबुत बनाउँछ।

सवालः तपाईंको नेतृत्वले अन्य प्रतिस्पर्धीहरूसँग तुलना गर्दा के फरक ल्याउन सक्छ ?
जवाफः मेरो नेतृत्व समावेशी र नतिजा(केन्द्रित हुनेछ। म केवल समस्याहरूको पहिचानमात्र होइन, तिनको समाधानमा तत्काल कदम चाल्न चाहन्छु। मेरो फरक क्षमतामा व्यवसायीहरूको आवाजलाई प्राथमिकता दिनसक्ने सामर्थ्य र पारदर्शिता ल्याउने प्रतिबद्धता समावेश छ।

सवालः अन्तरवार्ताको अन्त्यमा के भन्न चाहानुहुन्छ ?
उत्तरः मकवानपुरलाई आर्थिक रूपमा बलियो बनाउनु हाम्रो सबैको साझा लक्ष्य हो। म, मेरो टिम र मेरो योजनाले व्यवसायीक विकासका लागि प्रतिबद्ध छौं। यो संघ व्यवसायीहरूको मात्र होइन, सम्पूर्ण मकवानपुरको भविष्य हो। त्यसैले, मलाई र मेरो टिमलाई मतदान गरेर हाम्रो योजनालाई कार्यान्वयन गर्ने मौका दिनुहोस्। म तपाईंहरूको विश्वासलाई कहिल्यै तोड्नेछैन।