हेटौंडामा आज कुमा सागरको कन्सर्ट हुँदै

हेटौंडा । हेटौंडामा कुमा सागर एण्ड द ख्वोपा म्युजिक ब्याण्डको कन्सर्ट हुने भएको छ । नेपाल साउण्ड वेभ्स इभेण्ट्सको आयोजनामा आज (शुक्रबार) कुमा सागरको म्युजिक ब्याण्डको कन्सर्ट हुने भएको हो ।

हेटौंडा–४ स्थित भूटनदेवी माध्यमिक विद्यालयको चौरमा हुने कन्सर्टमा विभिन्न सांस्कृतिक तथा सांगीतिक कार्यक्रम रहने कार्यक्रम संयोजक संगीत श्रेष्ठले जानकारी दिए । कुमा सागरको हेटौंडामा यो पहिलो कन्सर्ट हो ।

हालसम्म करिब ६ सय टिकट बिक्री भएको उनले बताए । नेवारी संस्कृतिको विकास तथा प्रवद्र्धन गर्ने उद्देश्यले आयोजना गर्न लागेको कन्सर्टमा लोकनृत्य, नेवारीनृत्य लगायतका विभिन्न गायन प्रस्तुती रहने उनले बताए । उनका अनुसार करिब १५ लाख रुपैयाँ खर्च हुने अनुमान गरिएको कन्सर्टमा ५ लाख रुपैयाँ कलाकारका लागि खर्च हुनेछ ।

कन्सर्टमा साधारण प्रवेश शुल्क प्रतिव्यक्ति ५ सय र भिआइपी प्रवेश शुल्क प्रतिव्यक्ति एक हजार रुपैयाँ निर्धारण गरिएको उनले बताए । कन्सर्टबाट भएको फाइदाबाट विद्यालयका निम्न वर्गका विद्यार्थीका लागि शैक्षिक सामग्री तथा न्यानो कपडा वितरण गरिने उनको भनाई छ ।

६ वटा खाजाको स्टल व्यवस्था गरिएको कन्सर्टमा करिब ४ हजार दर्शकको उपस्थिति रहने अनुमान गरिएको छ ।

जिल्ला प्रशासन कार्यालय मकवानपुर, जिल्ला प्रहरी कार्यालय मकवानपुर, जिल्ला ट्राफिक प्रहरी कार्यालय मकवानपुर लगायतसँगको सहकार्यमा सुरक्षा व्यवस्थापन गरिने उनले बताए ।