मकवानपुरमा सवारी दुर्घटना हुँदा दुई जनाको मृत्यु

मकवानपुर । मकवानपुरमा सवारी दुर्घटना हुँदा दुई जनाको मृत्यु भएको छ । शनिबार वीरगञ्जबाट चितवनतर्फ जाँदै गरेको बागमती प्रदेश ०१–०२६ च ५२५० नम्बरको स्कार्पियो र चितवनबाट हेटौंडातर्फ आउँदै गरेको बा १६ च ८३२४ नम्बरको कार पूर्व–पश्चिम राजमार्गअन्तर्गत मनहरी–६ मा ठोक्किँएर दुर्घटना हुँदा दुई जानाको मृत्यु भएको मकवानपुर प्रहरी नायव उपरीक्षक श्यामु अर्यालले जानकारी दिए ।

प्रहरी नायव उपरीक्षक अर्यालका अनुसार, दुर्घटनामा परेर कार चालक हेटौंडा–४ स्कुलरोड बस्ने ६० वर्षीय सुरेन्द्रलाल श्रेष्ठ र कारमा सवार चितवन राप्ति नगरपालिका वडा नबर–२ गड्यौलि बस्ने ५० वर्षकी सुनिता श्रेष्ठको मृत्यु भएको हो । दुर्घटनमा परेर गम्भीर घाइते भएका उनीहरुको उपचारको क्रममा मृत्यु भएको हो ।

कारमा सवार तीन र स्कार्पियोमा सवार ९ जना गम्भीर घाइते भएको प्रहरी नायव उपरीक्षक अर्यालले बताए । घाइते अधिकांशको हात, खुट्टा र शरीरका विभिन्न भागमा गम्भीर चोट लागेको छ । घाइते सबैलाई उपचारका लागि चितवनको भरतपुरमा पठाइएको प्रहरी नायव उपरीक्षक अर्यालले बताए ।

यस्तै, दुर्घटनामा परेर स्कारपियो चालक रौतहटका देबही गोनाही नगरपालिका–३, बस्ने वर्ष २७ को किशन जैसवाल भन्ने किशन प्रसाद साह घाँटि र छातिमा भित्रि चोट लागि स्पर्स अस्पताल वीरगंज पर्सामा उपचार भइरहेको छ । उनको अवस्था गम्भीर रहेको प्रहरी नायव उपरीक्षक अर्यालले बताए ।