हेटौंडाबाट गाँजासहित दुई जना पक्राउ
तु खबर संवाददाता२०८१ पुष २८,आईतवार १७:४०
मकवानपुर । पूर्व–पश्चिम सडकखण्ड अन्तरगत पर्ने मकवानपुरको हेटौंडा उपमहानगरपालिका–१९ नेवारपानीबाट अवैध लागूऔषध गाँजासहित दुई जना पक्राउ परेका छन् ।
आज बिहान लागूऔषध गाँजा १५ किलो ७ सय ग्रामसहित दुई जना पक्राउ परेको जिल्ला प्रहरी कार्यालय मकवानपुरले जनाएको छ ।
पक्राउ पर्नेमा मनहरी गाउँपालिका–३ सिद्दकाली बस्ने ४० वर्षीय बाबु बल रहेका छन् । पक्राउ परेका अर्का एक जनाको भने हाल नाम नखुलेको जनाइएको छ ।
उनीहरुलाई इलाका प्रहरी कार्यालय नेवारपानीबाट खटिएको प्रहरीले पक्राउ गरेको हो । नारायणगढबाट बारातर्फ जाँदै गरेको ना ५ ख ५१२९ नम्बरको बसमा सवार उनीहरूलाई उक्त गाँजासहित पक्राउ गरिएको हो ।
पक्राउ परेका उनीहरुमाथि प्रहरीले आवश्यक अनुसन्धानका साथै कानूनी प्रकृया अगाडि बढाइएको छ ।
