तामाङ विद्यार्थी घेदुङ मकवानपुरले वक्तृत्वकला प्रतियोगिताको आयोजना गर्दै

हेटौंडा । नेपाल तामाङ विद्यार्थी घेदुङ मकवानपुरले वक्तृत्वकला प्रतियोगिता आयोजना गर्ने भएको छ । यही माघ २० गते तामाङ समुदायको विशेष पर्व तथा नयाँ वर्ष मञ्जुश्री संवत् २८६१ (डुक ल्हो) सोनाम ल्होछारको अवसरमा उक्त प्रतियोगिताको आयोजना गर्न लागिएको हो ।

‘तामाङ इतिहास र सोनाम ल्होछार’ विषयक वक्तृत्वकला प्रतियोगिता आयोजना गर्न लागेको तामाङ घेदुङ मकवानपुरका अध्यक्ष छोइसाङ लामा स्याङ्तानले जानकारी दिए ।

उनका अनुसार, हेटौंडा क्याम्पसको सभाहलमा हुने प्रतियोगिताको प्रथम, द्धितीय र तृतीयलाई क्रमशः नगद ५ हजार, ३ हजार र २ हजार रुपैयाँसहित प्रमाण पत्र र मेडल प्रदान गरिनेछ ।

प्रतियोगितामा तामाङ समुदायसँगै जुनसुकै समुदायका विद्यार्थी सहाभागी हुन पाउने उनको भनाई छ । विद्यार्थीले अनलाईन मार्फत् पनि आवेदन दिन सकिने उनले बताए ।