हेटौंडा उपमहानगरपालिका बालमैत्री घोषणा हुँदै

मकवानपुर । मकवानपुरको हेटौंडा उपमहानगरलाई बालमैत्री घोषणा गरिने भएको छ । मंगलबार पत्रकार सम्मेलनको आयोजना गर्दै उपमहानगरपालिकालाई आगामी फागुन १ गते बालमैत्री घोषणा गर्न लागेको जानकारी गराइएको हो ।

पत्रकार सम्मेलनमा नगर प्रमुख मीनाकुमारी लामाले विभिन्न सूचक पूरा गरेसँगै हेटौंडा उपमहानगरपालिकालाई  ‘‘निकृष्ट बालश्रममुक्त, बालविवाह मुक्त तथा बालमैत्री स्थानीय शासनयुक्त’’ घोषणा गर्न लागेको बताइन् । बालमैत्री घोषणा कार्यक्रम उपप्रधानमन्त्री प्रकाशमान सिंहको प्रमुख आतिथ्यतामा गरिने उनले बताइन् ।

घोषणा कार्यक्रम अघि बिहान १० बजेबाट बुद्ध चोक, राप्ती रोड, न्युरेनी पेट्रोल पम्प, स्कुलरोड, बलराम दास पेट्रोल पम्प हुँदै क्याम्पा रंगशालासम्म बिहान १० बजेदेखि बृहत प्रभातफेरी कार्यक्रमको आयोजना गरेको उनले बताइन् ।

कार्यक्रमलाई नगरको गौरब, प्रतिष्ठा र शानको विषयको रुपमा लिई यस महान असिभयानलाई सम्भय र भव्य रुपमा सम्पन्न गर्न सम्पूर्ण नगरबासीहरुले आ–आफ्नो तह र तप्काबाट सहभागी भई सहयोग गर्न उनले आग्रह गरेकी छन् ।

बालमैत्री स्थानीय शासन कार्यान्वयन निर्देशिका २०७८ र बालमैत्री घोषणा कार्यान्वयन कार्यविधि २०७९ ले हेटौंडाको सबै वडा बालमैत्री घोषित भइसकेको बताउँदै उनले भनिन्, ‘हेटौंडाको १९ वटै वडा बालमैत्री घोषित भएसँगै उपमहानगरपाकिालाई पनि बालमैत्री घोषणा गर्न लागेको हो ।

बालमैत्री स्थानीय शासनयुक्त नगर समिति तथा घोषणा मूल समारोह समिति संयोजक समेत रहेकी उनले बालमैत्री घोषणा गर्न हेटौंडा उपमहानगरका वडाहरूमा विभिन्न संंरचना बनाएको बताइन् ।

हेटौंडालाई बालमैत्री बनाउन विभिन्न चुनौती रहेको बताउँदै उनले सरोकारवालाहरू स्थानीय तहलाई बालमैत्री घोषणा गर्नुभन्दा पनि त्यसलाई निरन्तरता दिनु ठूलो चुनौती रहेको उल्लेख गरिन् ।

बालमैत्री घोषणा गर्न आवश्यक बालमैत्री स्थानीय शासनका ५१ सूचकहरुमा हेटौंडा उपमहानगरपालिकाले ४३ वटा सूचकमा सय प्रतिशत, एउटा सूचनकमा ९९ दशमलव ९४ प्रतिशत, एउटा सूचकमा ९९ दशमलव ८९ प्रतिशत, एउटा सूचकमा ९९ दशमलव ८७ प्रतिशत, एउटा सूचकमा ९९ प्रतिशत, एउटा सूचकमा ९८ दशमलव ६३ प्रतिशत, एउटा सूचकमा ९६ दशमलव ८४ प्रतिशत, एउटा सूचकमा ९१ प्रतिशत र एउटा सूचक ८८ दशमलव ०६ प्रतिशत नजिता हाँसिल भएको उनले जानकारी दिइन् ।

पूर्वमा बकैया गाउँपालिका, पश्चिममा मनहरी र राक्सिराङ गाउँपालिकाहरु, उत्तरमा मकवानपुरगढी, भीमफेदी, कैलाश गाउँपालिका र दक्षिणतर्फ मधेश प्रदेश अन्तरगतको उत्तरी सिमानामा पर्ने हेटौंडा उपमहानगरपालिकाको कुल क्षेत्रफल २६१ दशमलव ५८ वर्ग किलोमिटर रहेको छ ।

सो पालिकामा १८ वर्ष भन्दा कम उमेर समूहका ५० हजार १९५ जनसंख्या रहेका छन् । जसमा २६ हजार १४५ बालक र २४ हजार ५० बालिका रहेका छन् । बालबालिकाको संख्यालाई आधार मानदा ५२ दशमलव ८ प्रतिशत बालक र ४७ दशमलव ९१ प्रतिशत बालिका रहेका छन् ।

यस उपमहानगरपालिकामा २६५ टोलस्तरीय र १०६ वटा बालसमूह गरी जम्मा ३७१ वटा ३७१ बाल समूह तथा १९ वडास्तरीय र १ नगरस्तरीय गरी २० वटा बाल समूह सञ्जालसहित ३७१ वटा बालबालिकाका संरचना क्रियाशील अवस्थामा छन् । ती विभिन्न संरचनागत समितहरु समेत गरी ९ हजार २५० जना बालिबालिकाको प्रत्यक्ष सहभागिता रहेको छ ।