हेटौंडा राजधानी बनाउने नेकपा निर्णयको स्वागत गर्छु : कमल थापा

हेटौंडा, १४ पुस । प्रदेश ३ को राजधानी हेटौंडा र नाम बाग्मती राख्ने गरी प्रक्रिया अघि बढाउन नेकपा केन्द्रीय सचिवालयले गरेको निर्णयको पूर्वउपप्रधानमन्त्री तथा राष्ट्रिय प्रजातन्त्र पार्टी (राप्रपा)का अध्यक्ष कमल थापाले स्वागत गरेका छन् ।

सत्तारुढ दल नेपाल कम्युनिस्ट पार्टी(नेकपा)को आइतबार प्रधानमन्त्री निवास बालुवाटारमा बसेको सचिवालय बैठकले प्रदेश ३ को नाम वाग्मती राख्ने निर्णय गर्दै राजधानी हेटौंडा नै कायम गर्ने सहमती भएको थियो ।

बैठकले प्रदेशको नाम वाग्मती र राजधानी हेटौंडा कायम गर्नेगरी प्रदेश कमिटी तथा प्रदेशसभा दललाई निर्देशन दिने निर्णय गरेको हो ।

थापाले व्यापारिक केन्द्र, संरचनालगायतका सबै दृष्टिकोणले हेटौंडा प्रदेशको राजधानी बनाउन उपयुक्त भएको बताए ।

तत्कालिन प्रधानमन्त्री शेरबहादुर देउवाको अध्यक्षतामा बसेको मन्त्रीपरिषद् बैठकले प्रदेश राजधानी टुंग्याउने क्रममा प्रदेश ३ को अस्थायी राजधानी हेटौंडा राख्ने निर्णय गरेको थियो ।

सोही मन्त्रीमण्डलमा सरकारको उपप्रधान तथा परराष्ट्र मन्त्री कमल थापा थिए । उनै थापाले मन्त्रीपरिषद्मा प्रदेश ३ को अस्थायी मुकाम हेटौंडा बनाउने प्रस्ताव लगेका थिए । उनको प्रस्तावमा हेटौंडालाई अस्थायी मुकाम घोषणा गरिएको थियो ।

यो पनि पढ्नुहोस्

हेटौंडालाई प्रदेश ३ को स्थायी राजधानी बनाउने निर्णयप्रति मेरो समर्थन : बानियाँ

नेकपाको निर्णयः राजधानी हेटौंडा, नाम बाग्मती

‘दुई तिहाई सदस्यहरु राजधानी हेटौंडाबाट सार्ने पक्षमा’

‘हामी नाममात्रैको प्रदेश सदस्य, सबै काम केन्द्रले गरोस्’– राजेन्द्र पाण्डे