राजधानी र नामको लागि हुने मतदान धकेलियो

तु खबर संवाददाता

२०७६ पुष २१,सोमबार १३:३३

हेटौंडा, २१ पुस । आज बिहान बसेको प्रदेश ३ को कार्यव्यवस्था परामर्श समितिको बैठक सकिएको छ । बैठकले आज दिउँसो बस्ने प्रदेशसभा बैठकमा लैजाने एजेण्डा तय गरेको छ ।

आजको बैठकमा प्रदेशको नामाकरण कार्यविधि प्रस्ताव माग्ने निर्णय गरेको छ । प्रदेश ३ को राजधानीकाको लागि हुने मतदान प्रक्रिया भने अनिश्चित देखिएको छ । प्रदेश ३ को स्थायी राजधानी र नामाकरणको मुख्य एजेण्डा लिएर प्रदेश ३ को प्रदेशसभा बैठक आजदेखि बस्दैछ ।

मतदानको मिति धकेलिने संकेत देखिएको छ । कार्यव्यवस्था परामर्श समितिले आज हुने बैठकमा शुभकामना आदनप्रदान, छलफल प्रक्रिया र नामाकरणको विषयमा कार्यविधि प्रस्ताव माग्ने एजेण्डा तय गरेको सभामुख सानुकुमार श्रेष्ठले जानकारी दिए ।

श्रेष्ठका अनुसार सत्तारुढ दल नेकपा संसदीय दलको बैठक नसकिएको कारण मतदान प्रक्रिया पछि धकेलिने भएको हो । केहीदिन अघि बसेको कार्यव्यवस्था परामर्श समितिको बैठकले २१ गते छलफल प्रक्रिया र २२ गते मतदान प्रक्रियामा लैजाने एजेण्डा तय गरेको थियो ।

‘मतदान प्रक्रिया २२ गते गर्ने तयारी थियो । नेकपा संसदीय दलको बैठक नसकिएको कारण मिति सर्नेछ ।–’ श्रेष्ठले तु खबरसँग कुरा गर्दै भने । नेकपा संसदीय दलको बैठक भोली मंगलबार बिहान बस्दैछ । संसदीय दलको निर्णयपछि मतदान प्रक्रिया निश्चित हुने देखिएको छ ।

गत आइतबार सत्तारुढ दल नेकपाको केन्द्रीय सचिवालय बैठकले प्रदेश ३ को राजधानी हेटौंडा र नाम बागमती राख्न प्रदेश ३ को नेकपा संसदीय दललाई निर्देशन दिएपछि प्रदेश सरकार तातिएको थियो ।

प्रदेशसभाको आजबाट सुरु हुने बैठकको मुख्य एजेन्डा प्रदेशको नाम र राजधानी हुने बताइएको छ । प्रदेशसभाको दुई तिहाइ बहुमतबाट प्रदेशको नाम र राजधानी टुंगो लगाउनुपर्ने संवैधानिक व्यवस्था छ । तर, प्रदेशसभाको सत्तारुढ दल नेकपाबीचमै प्रदेशको नाम र राजधानीलाई लिएर विमति छ ।

पार्टी सचिवालयले राजधानी हेटौंडा र नाम बागमती राख्न गरेको निर्णय अनुमोदन गराउन नेकपा प्रदेश ३ संसदीय दलको बैठक बसे पनि बिनानिष्कर्ष मंगलबारसम्मका लागि स्थगित भएको छ । शुक्रबारदेखि जारी बैठक आइतबार ठोस निर्णय गर्दै स्थगित गर्ने बताइए पनि विवादले निर्णय हुन सकेको छैन् ।

अघिल्लो हप्ता मन्त्रीपरिषद्ले आकस्मिक बैठक राख्दै प्रदेशसभाको बैठक २१ गते बोलाउन प्रदेश प्रमुखलाई सिफारिस गर्ने निर्णय गरेको थियो । आर्थिक वर्ष ०७६–७७ को बजेट पारित गर्दै गत भदौ २४ बाट स्थगित बैठक सोमबार दिउँसो ३ बजे बस्न लागेको हो ।

प्रदेशको नाम र राजधानीबारे मतदान भएमा नेकपाको प्रस्ताव पारित हुनेछ । प्रदेश ३ को ११० सदस्यीय सभामा ८० सांसद् नेकपाका छन् । यो संख्या प्रदेशको नाम र राजधानीको प्रस्ताव पारितका लागि ७४ मत भए पुग्छ ।

प्रदेश ३ को प्रदेशसभामा कांग्रेसका २२, विवेकशील साझाको ३, नेपाल मजदुर किसान पार्टीको २, राप्रपा, राप्रपा संयुक्त र स्वतन्त्र गरी १–१ सांसद् छन् ।

राजधानी र नामको लागि हुने मतदान धकेलियो

यो पनि पढ्नुहोस्

यसमा तपाइको मत Cancel reply

ताजा समाचार

दुर्घटनामा परेर तीन जनाको मृत्यु

यस्तो रहनेछ आजको मौसम

एमालेको जनजागरण सभा आज

आज हेटौंडाको यी फिडरमा विद्युत अवरुद्ध

नेपाल एयरलाइन्सले हवाई भाडा घटायो